Aldi haretan, herria kezkatan egoan, eta euren barruan itaunka, Joan hori ez ete zan Kristo berbera. Joanek honan erantzun eutsen guztiei:
- «Nik urez bateatzen zaituet; baina badator ni baino ahaltsuagoa dana, ni ez naz inor Haren oinetakoen lokarriak askatzeko ere-ta. Harek Espiritu Santuaz eta suz bateatuko zaitue».

Herri guztia bateatzen egoan baten, Jesus ere bateatu egin zan. Eta otoitzean egoala, zerua zabaldu zan, eta Espiritu Santua jatsi jakon gainera, uso-irudian. Eta zeruko ahots batek honan esaten eban:
- «Zeu zara nire Semea, nire Maitea; Zeugan dot nire atsegina».

- Zati bi ditu Jesusen bateoari buruz Lukasek dakarren kontakizunak. Lehenengoan (15-16. aa.), argi bereizten dira Joanen urezko bateoa eta Jesusen bateoa. Juduen ohitura zaharrei egokien garbiketarako zan Joanena. Bizitza barria emonez bihotza aldatzen dauan Espiritu Santuak egindakoa Jesusena. Bigarren zatian (21-22. aa.) Jesusen bateoaren nagusitasuna eta aberastasuna adierazten dira. Izan bere, honegan agertzen da Jesus Mesias eta Jainkoaren Seme lez. Espirituaren dohaina dogu kristau bateoa. Semearen bitartez, Jainko seme-alaba bihurtzen da kristaua. Jainkoaren Espiritua Jesusegan agertzearen aparteko unea dogu bateoa. Lukasen teologian ohikoa danez, Espiritu Santuaren beste dohain bat dan otoitzean diharduala hartzen dau Jesusek.

- Bikoitza da, beraz, Jesusen eginbeharra munduan: Aitak bialdutako Mesias da bera. Horregaitik hartzen dau Espirituaren indarra gizon-emakumeen Salbatzaile izateko eginkizunerako, Jainkoaren beraren misteriotik atarata, Honengandik dator eta. Baina, baita bere, Aitaren Seme kutuna dogu bera, Jainkoaren agiriko aurpegia, Aitagandik entzundako eta gizakiei zabaldutako Berbearen agertzailea.

- Jesusen eginkizun horretatik sortzen da Elizearen eta kristauaren bokazinoa: Aitak Semeagaz bialtzen deuskun maitasun mezua onartzea, gero geuk bere anai-arrebei emoteko. Gainera, norbere bateoa bizi izateko mezua sortzen da, jakin badakigu-eta emon jakun Espirituaren eta bizitza barriaren jabe gareala. Holan, Jainkoaren seme-alabei jagokenez jokatu behar dogu, gizakia aske egiten dauan egi bakarra dan Jainko bizitzaren lekuko izateko (Jn 8, 31).

- Beraz, “Zu zara nire Semea, nire Maitea” egoera barri horretan jaioten dan dinamikan bizitzea da nire jarraitzaile bizitzarako eginbeharra. Bakoitzean ikustea, eta harrapatua izatea eta horregaitik Semeagan seme-alaba lez bizitzea… da nire bizitzarako helburu osoa. Nire BOKAZINOA da, esangura sakonenean. Ondo dago mezu hau, Gabon aldi honetako barritasun osoa dastatu ahal izateko.

“Jesus Jauna, egin nagizu zeu lakoa, BETI Jainko-Aitaren maitasun hurkoa sumatu dagidan, egoera barri hori neugandu dagidan eta, kutsadura lez, eskaini deioedan nire anai-arreba diran gizon-emakumeei. Holan, Zeuk lez biziko dot nire BOKAZINOA”.